بہتر تو یہی ہے کہ بندے کو

 عشق حقیقی 

۔۔۔۔۔۔۔۔۔۔۔۔۔

بہتر تو یہی ہے کہ بندے کو اللہ تعالیٰ سے محبت ہو، لیکن یہ چھوٹی چھوٹی محبتیں بھی غنیمت محسوس ہوتی ہیں، جب بات صرف زندہ رہنے کی ہو رہی ہو۔ یہ عزیز و اقارب اور مال و دولت اور عہدوں کی محبتیں کچھ مشغول تو رکھتی ہی ہیں انسان کو۔ 

لیکن زندگی کا معیار یہی ہے کہ بندے کو اللہ تعالیٰ سے محبت ہو۔

سورہ توبہ کی ایک آیت مبارکہ کا مفہوم ہے، کہ اگر تمہیں اپنے بال بچے، عزیز و اقارب، مال و دولت، گھر کاروبار وغیرہ اللہ اور رسول  ﷺ  سے زیادہ محبوب ہیں، تو تھوڑا ٹھہرو، اللہ اپنا امر لے کر آئے،۔۔۔۔۔

مطالبہ عشق حقیقی کا ہی ہے۔ زندگی کا معیار عشق حقیقی تک پہنچنا ہی ہے۔ تگ و دو، اور کوشش عشق حقیقی کی ہی ہونی چاہئے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ بڑی عجیب بات ہے کہ میرا عشق حقیقی اور مجازی کا تصور بس سرور و سرمستی تک ہی ہے۔ نہ میں کبھی اس سے آگے سوچ سکا نہ جا سکا۔ 

آج  جب زندگی اپنے انجام کی طرف رواں دواں ہے، تو میں بہت سی باتیں، بس ماضی کے حوالے سے ہی سوچتا رہتا ہوں۔ کتاب ختم ہو رہی ہو تو بندہ بس یہی سوچتا رہتا ہے، کہ پیچھے یہ یہ پڑھ آیا ہوں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اشفاق احمد صاحب کسی انٹرویو میں کہہ رہے تھے، کہ جس مقام اور مرتبے کی امید تھی، وہ مل نہیں سکا، وہ تک پہنچ نہیں سکا۔ میں نے اور بھی کئی لوگوں سے اس طرح کی باتیں سنی ہیں۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عشق کی کائنات شائد اتنی وسیع ہے، کہ بندہ جہاں بھی کھڑا ہوتا ہے، ارد گرد اتنا ہی وسیع نظر آتا ہے، جتنا پہلے کہیں نظر آتا تھا۔ جب پوری کائنات کے حوالے سے دیکھا جائے تو کیا مقام اور کیا مرتبہ۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

انسان میں عشق و محبت کا تصور بھی کوئی پیدائشی طور پر گندھا ہوا ہے۔ یہ تصور بھی بہت بڑی نعمت ہے۔ میں پچھلے دنوں اپنے ایک کولیگ سے بات کر رہا تھا، کہ ساری زندگی کسی ایسے باس کی تلاش میں گزر گئی، جس کا حکم ماننا سعادت محسوس ہو۔ 

انسان کو کسی سے محبت ہو جائے، کسی سے عقیدت ہو جائے، کسی کا احترام کرنے لگے دل و جان سے بڑھ کر، اور کیا چاہئے بھلا۔ کتنے خوبصورت جذبے ہیں یہ۔ میں تو ساری زندگی اس تصور میں ہی بیٹھا رہا ہوں۔ مجھے یہ سب کچھ محسوس ہوا بھی ہے، لیکن اتنا نہیں ہوا، کہ میں اپنے ہوش و حواس کھو بیٹھتا۔ مر مٹتا۔ مجھے اپنے باقی رہنے پر بہت افسوس ہوتا ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بیا دل در خم گیسوئے او بند

اگر خواہی خلاص و رستگاری

آ اس کی زلف کے پیچ میں اپنا دل باندھ، اگر تو خلاص و نجات چاہتا ہے۔

فارسی شاعری ایسے شعروں سے بھری پڑی ہے۔ مجھے بڑے اچھے لگتے ہیں یہ شعر۔ میں چاہتا ہوں زندگی واقعی ان شعروں جیسی ہو جائے۔ 

جاں فدائے تو ہم جانی و ہم جانانی

ہر کہ شد خاک درت رست ز سرگردانی۔

میں سوچتا ہوں بندہ واقعی اس کے در کی خاک ہو جائے، تو کیسی عظمت و بلندی نصیب ہو۔ 

جان تجھ پر قربان ہو، کہ تو جان بھی ہے، اور جاناں بھی ہے۔ جو انسان تیرے در کی خاک ہوا وہ سرگردانی سے چھوٹ گیا۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پچھلے دنوں میرا ایک دوست بیٹھا تھا میرے پاس۔ ہمارے درمیان کوئی گفتگو جاری تھی، اور ہم بہت سے گلی کوچوں سے گزر کر محبت تک آ گئے تھے۔ 

میں نے کہا، میں نے اس لڑکی کی ایک تصویر پر آٹھ ہزار شعر لکھے تھے،۔۔۔۔۔ وہ بیٹھا بیٹھا جیسے منہ کے بل گر گیا۔ 

کہتا ہے، شاہ جی اس ایک جملے پر پی ایچ ڈی کر سکتا ہے کوئی۔ کہتا ہے، شاہ جی آپ نے کبھی ذکر ہی نہیں کیا اس بات کا۔ میں نے بارہ پندرہ سال پہلے کے فولڈر کھولے اور سنانے لگا۔ 

اگلے تین چار گھنٹے وہ میری غزلیں سنتا رہا۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میرا عشق مجازی اور عشق حقیقی کا سفر کیسا رہا، میرا دل چاہتا ہے کبھی اس پر لکھوں۔ زندگی کے جس لق و دق صحرا سے اس وقت گزر رہا ہوں، شائد اس میں کچھ ہریالی نظر آ جائے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اللہ تعالیٰ ہمارے دلوں کو اپنی محبت سے شاد و آباد فرمائے، آمین۔ 

۔۔۔۔۔۔۔۔۔۔۔۔ 

بقلم: حاوی شاہ