میں نے والد صاحبؒ کے ساتھ بہت وقت گزارا، انہیں بہت سنا، لیکن شائد ہی کبھی کوئی سوال کیا ہو۔ میرے والد صاحبؒ میرے پیر و مرشد بھی تھے۔
”ابا جی، یہ موچیوں کے بارے میں بڑا کچھ پڑھنے کو ملتا ہے قصے کہانیوں میں، کہ فلاں جگہ پر ایک موچی تھا، بڑا اللہ والا تھا۔ موچیوں میں کوئی خاص بات ہوتی ہے کیا“، ایک دن میں نے شوخی شوخی میں ایک سوال کر دیا۔
والد صاحب کھانا کھاتے کھاتے، ہاتھ روک کر بولے ”موچی ٹوٹے ہوئے تعلق کو جوڑ دیتا ہے۔ موچی چمڑے کے دو ٹکڑوں کو سی کر ایک کر دیتا ہے“۔
یہ جواب میرے دل میں بیٹھ گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔
میں موچیوں کا بہت احترام کرتا ہوں۔ میں پہلے جوتا مرمت کروانے جاتا تو ان کے پاس زمین پر بیٹھ جاتا۔ میرا موچی تھا بھی بڑا نیک۔ حق حلال کی کمانے میں بہت باریک بین تھا۔
میں موچیوں کا سامان لے کر آیا، اور اپنے جوتے خود مرمت کرنے لگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرے لکھنے کا ایک ہی مقصد ہے، اللہ اور بندے کے تعلق کو جوڑ دوں۔ بندے کو اللہ سے ڈائریکٹ کر دوں۔ جتنا مجھے علم ہے اتنا کر دوں۔ ایک ذرہ برابر ہی کر دوں۔ اللہ سے روکنے والی ہر چیز درمیان سے کلئیر کر دوں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اللہ تعالیٰ ہمارے دلوں کو اپنے قرب کا احساس عنایت فرمائے، آمین۔
۔۔۔۔۔۔۔۔۔۔۔۔۔۔۔۔۔۔۔۔
بقلم: حاوی شاہ
No comments:
Post a Comment