مجھے جب اللہ تعالیٰ سے محبت کا تصور لینا ہو

 

مجھے جب اللہ تعالیٰ سے محبت کا تصور لینا ہو تو حافظ کی شاعری پڑھ لیتا ہوں۔ کیسی خوبصورت دنیا ہے محبت کی، کیسا خوبصورت انداز ہے حافظ کا۔

میں نائنتھ ٹینتھ کا سٹوڈنٹ تھا جب میں نے پہلی بار دیوان پڑھا تھا۔ والد صاحب کی کتابوں میں ایک کتاب نظر آئی جو بغیر جلد کے تھی۔ فارسی لیکن اردو ترجمے کے ساتھ۔ میں نے پہلا صفحہ پڑھا، دوسرا صفحہ پڑھا اور پڑھتا ہی چلا گیا۔

میں کتاب بک بائنڈر کے پاس لے گیا، جلد کروائی، اور فارسی سیکھنے کی کوششیں شروع کر دیں۔ بس وہ دن ہے اور آج کا دن۔ سال سال دو دو سال، پانچ پانچ سال گھوم پھر کر، پھر دیوان کھول لیتا ہوں، پھر عشق و مستی کی اس کیفیت میں چلا جاتا ہوں، جو زندگی کا حاصل وصول لگتی ہے۔ کسی ایک کیفیت یا حالت پر ٹھہرنا میری فطرت میں نہیں ہے۔ لیکن جو عشق و محبت کی دنیا میں دل لگتا ہے، وہ کسی عقل و خرد کے عالم میں نہیں لگتا۔

زندگی عشق حقیقی کے بغیر فضول ہے۔ وہ انسان ہی کیا جس نے اللہ تعالیٰ سے محبت کا تصور نہ کیا۔ حافظ کی شاعری میں وہ تصور بار بار ملتا ہے۔ تصور کی حقیقت یہ ہے کہ بندہ کچھ لمحوں کے لئے ہی سہی، ایک دنیا سے دوسری دنیا کی سیر ضرور کر آتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔

ویسے تو عشق حقیقی کا مسئلہ یہ رہا ہے، کہ اسے عشق مجازی میں ہی لکھنا پڑتا ہے، لیکن عشق مجازی کو عشق حقیقی کا روپ دینا بھی ایک بڑی پرانی روایت ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیسی تصویر کشی کی ہے عشق مجازی کی۔

تمہیں پتہ تیری زلف کے پیچ میں یہ تل کیسا ہے۔ یہ وہ نکتہ ہے جو جیم کے دائرے میں پڑا نظر آتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔

اے عیسی نفس، میرے جسم پر تیرے سرو قد سائے کا وجود پتہ ہے کیسا ہے، اس جان کے جیسا ہے، جو تیرے ہاتھ لگانے سے سوکھی ہڈیوں میں پڑ جائے۔

۔۔۔۔۔۔۔۔۔۔۔۔۔۔۔۔۔۔

اے میری جان جیسے، میرا دل تجھے دیکھنے کی خواہش میں اس طرح ہو چلا ہے، جیسے کسی راستے کی ہوا کے پاؤں میں پڑی ہوئی دھول ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ شخص کہ جسے کعبہ کے علاوہ کہیں نہ ہونا چاہئے تھا، میں نے دیکھا وہ تیرے لبوں کی یاد میں میکدے کے دروازے پر پڑا ہوا تھا۔

۔۔۔۔۔۔۔۔۔۔۔۔

اس آخری شعر میں پتہ نہیں کون سی رمز ہے محبت کی، کہ دل پھڑک اٹھتا ہے۔ یہ ہے عشق حقیقی، یہ ہے اللہ تعالیٰ کی محبت۔ کیسے انسان دنیاوی مقام و مرتبے کو چھوڑ کر، کسی اور دنیا کی گداگری قبول کر لیتا ہے۔ کیسے اللہ تعالیٰ کی محبت اسے خوشی غم، عزت ناموس، نفع نقصان سے ماورا لے جاتی ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں ایک کم ہمت اور کم حوصلہ انسان ہوں، لیکن میرا دل بڑا کرتا ہے، کبھی اس عشق و محبت کی دنیا میں کچھ لمحے گزار آؤں۔ وہ دنیا کیسی خوبصورت ہو گی، جس کا تصور ہی اتنا خوبصورت ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تیرے گالوں کے فردوس کی مہکتی زلفیں چھوڑ کر، وہ کون سا طاؤس ہے جو جنت میں اڑا پھرتا ہے۔

۔۔۔۔۔۔۔۔۔۔۔۔۔۔۔۔۔۔۔

از قلم: حاوی شاہ