میں اپنا کام کروا کر

 میں اپنا کام کروا کر فارغ بھی نہیں ہوا تھا، کہ ایک شرمیلا سا بچہ، جسے شائد ڈر تھا، کہ میں بیل ہوتے ہی نکل نہ جاؤں، میرے پاس آ کر کہتا ہے، سر وہ جو آپ کہہ رہے تھے، کہ سوشل میڈیا پر کمایا بھی جا سکتا ہے، وہ کیسے ممکن ہے۔ مجھے کوئی لنکس بتائیں گے آپ۔

اس کے بات کرنے کا انداز اتنا دھیما، اور اس کا لہجہ اتنا رازدارانہ تھا، کہ ایک بچے نے کان لگا کر سننا شروع کر دیا، کہ ضرور کوئی اچھی بات پوچھ رہا ہے۔

میں نے اپنی ڈکٹیشن کے باقی الفاظ وہیں روکے، اور اس بچے سے بات کرنے لگا۔

”آن لائن بزنس کوئی بڑی بات نہیں ہے۔۔۔۔۔۔۔“ میں نے بات شروع کی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لیکن اس دن کے بعد سے آج تک میں یہی سوچ رہا ہوں، کہ بڑی بات تو ہے۔ میں تو سنی سنائی بات کر رہا تھا۔ اگر اتنا ہی آسان ہے، تو میں خود کیوں نہ کر سکا آج تک۔ میں نے اپنے سٹوڈنٹس سے یہ باتیں کرنا اس لئے بھی شروع کیا ہے، کہ ان میں پریکٹیکل لائف کا شعور پیدا ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بات دراصل یہ ہے کہ ہمارے ٹیچرز کچھ نان سوشل اور نان پریکٹیکل لوگ ہوتے ہیں۔ ہم جو بچوں کو موبائل اور انٹرنٹ سے دور رکھنا ہی بہتر سمجھتے ہیں، ہم نے انہیں موبائل اور انٹرنٹ کا کمانے والا پہلو کیا دکھانا۔ اور پھر ہم خود بھی اس کام میں پیچھے ہوتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہمارے ٹیچرز کی اب بھی ایک بہت بڑی تعداد موبائل کو کال کرنے اور سننے کے لئے ہی استعمال کرتی ہے۔

یہ کہنا بہت آسان ہے، کہ یوٹیوب پر نامحرم کے ایڈز چلتے ہیں، اس لئے اس کی کمائی ٹھیک نہیں ہے، لیکن اس ملک کے لوگوں کو کوئی ایسا کام بتانا، جس سے وہ کچھ کما سکیں، اتنا آسان نہیں رہا۔ ہر بندہ جو کچھ بھی کر رہا ہے، وہ یہی سوچ کر کر رہا ہے، کہ وہ غلط کر رہا ہے، لیکن مجبوری میں کر رہا ہے۔ بہت سے لوگ بیکار بھی اسی لئے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پتہ نہیں کون سا کوئی خوش نصیب لمحہ تھا، کہ سہیل صاحب کے مشورے سے میں نے ایک فیسبک پیج شروع کر لیا، کپڑے جوتے کے نام سے، جہاں اب میں آنلائن سٹور بنانا چاہ رہا ہوں۔ میرا مقصد اپنی مالی مشکلات کو دور کرنا بھی ہے، اور اپنی مذہبی اور مالی زندگی کو ہم آہنگ کرنا بھی ہے۔ اور سب سے بڑھ کر یہ جاننا بھی ہے، کہ آنلائن کاروبار کس طرح کرتے ہیں، تاکہ میں اپنے سٹوڈنٹس کو بتا سکوں۔ اگر میں کامیاب ہو گیا، تو شائد میرے بہت سے سٹوڈنٹس بھی کامیاب ہو جائیں، اور ان میں سے دو چار شائد انٹرنیشنل لیول تک بھی پہنچ جائیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اللہ تعالیٰ ہمارے ملک میں روزی رزق کے راستے آسان فرمائے، آمین۔

۔۔۔۔۔۔۔۔۔۔۔۔۔۔۔۔۔۔۔

بقلم: حاوی شاہ