میں عشا کی نماز پڑھ رہا تھا

 میں عشاء کی نماز پڑھ رہا تھا، اور سوچ رہا تھا وہ کون ہے، کہاں ہے، میں جس کے سامنے کھڑا ہوں۔ جو مجھے دیکھ رہا ہے، میں جس کے رابطے میں ہوں۔ 

بات یہ ہے کہ جسے پتہ ہے آپ کہاں ہیں، آپ بھی جان سکتے ہیں کہ وہ کہاں ہے۔ آخر کوئی تعلق تو ہے، رابطہ تو ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجھے یاد آیا میں نے ایک ایسے پڑھا تھا پینتیس چالیس سال پہلے۔ اور پھر کچھ سال پڑھایا بھی تھا۔ سر جیمز جینز کا لکھا ہوا ایسے، دا ڈائنگ سن۔

ہماری زمین، اور زمین میں ہمارا گھر، اور ہم۔ کتنی بڑی زمین ہے اور کتنا چھوٹا سا گھر۔ جو بہرحال ہمارے لئے سب کچھ ہے۔ یہ زمین ایک اپنی ہی طرح کے سیارے جوپیٹر سے اتنی چھوٹی ہے، کہ اس طرح کی کئی ایک زمینیں اس جوپیٹر میں سما جائیں۔ اور وہ جوپیٹر جو اتنا بڑا ہے، ہمارے اس سورج کے سامنے اتنا چھوٹا ہے، کہ اس سورج میں اس جیسے اربوں کھربوں جوپیٹر سما جائیں۔ 

ہمارا یہ اتنا بڑا سورج اس کائنات کا ایک چھوٹا سا ستارہ ہے۔ زیادہ تر ستارے اس سے بڑے ہی ہیں۔ اور بعض ستارے اتنے بڑے ہیں، کہ اس طرح کے سورج جیسے ان گنت ستارے اپنے اندر سمو لیں۔ 

کائنات میں بڑے بڑے ستاروں کی تعداد اتنی زیادہ ہے جتنی اس زمین کے تمام ساحلوں پر ریت کے ؒذرات کی تعداد۔ شائد اس سے بھی زیادہ۔ 

اور وہ اتنے بڑے بڑے اور اتنے زیادہ ستارے، ایک دوسرے سے اتنے دور ہیں، کہ شائد ہی کبھی کوئی ستارہ کسی دوسرے ستارے کے قریب سے گزرا ہو۔ اتنا قریب سے کہ چھوٹے ستارے میں کوئی ارتعاش پیدا ہوا ہو۔ ایک ستارہ دوسرے ستارے سے اربوں کھربوں نوری سال کے فاصلے پر ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بندہ جیمز جینز کے ساتھ ساتھ سوچتا جائے، تصور کرتا جائے، تو حیران رہ جاتا ہے، کہ کتنے بڑے بڑے ستارے ہیں، اور کتنی زیادہ تعداد میں ہیں، اور کتنے دور ہیں ایک دوسرے سے۔ کتنے کتنے بڑے فاصلے پر۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں نماز پڑھ رہا تھا اور سوچ رہا تھا، وہیں کہیں میرا خالق و مالک مجھے دیکھ رہا ہے۔ کیسی محبت سی جاگ اٹھتی ہے اس تصور سے۔ وہ بھولا نہیں ہے مجھے، اور اس نے چھوڑا بھی نہیں ہے۔ اپنے پاس سے دور بھیج کر بھی وہ مجھ سے رابطے میں ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔

مجھے یاد آیا میں نے کائنات کی تصویریں نکالی تھیں ایک بار، درمیان میں ایک لائٹ سی تھی اور اردگرد ستارے ہی ستارے، اور سب گھومتے ہوئے۔ مجھے ایک دم خیال آیا اس کائنات کے اس سینٹر میں میرا مالک و رازق ہے۔ وہ مجھے دیکھ رہا ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سچ پوچھیں تو یہ عشاء کی نماز بڑی خوبصورت تھی۔ بہت دیر تک یہ تصور چلتا رہا۔ 

۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اللہ تعالیٰ ہمارے دل و دماغ کو اپنے قرب کی کیفیت سے آشنا فرمائے، آمین۔ 

۔۔۔۔۔۔۔۔۔۔۔۔۔۔۔۔

بقلم: حاوی شاہ